Uko wahagera

Riek Machar Ashobora Gutangiza Indi Ntambara


Riek Machar

Riek Machar

Riek Machar, wahoze yungirije umukuru w’igihugu muri Sudani y’Epfo ubu akaba abarizwa mu buhungiro yavuze ko umutwe we utifuza intambara ariko yongeraho ko leta n’itubahiriza ibikubiye mu masezerano y’amahoro ashobora gutangiza intambara.

Ibyo Machar yabivuze mu kiganiro cyihariye yahaye Ijwi ry’Amerika. Yavuze ko umutwe ayoboye wa Sudan People Liberation Movement in Opposition ukomeje kwiyubaka utegura intambara yo gukuraho leta ya Perezida Salva Kiir.

Yongeyeho ko yifuza kubyutsa amasezerano y’amahoro yashyizweho umukono mu mwaka wa 2015 hagati y’umutwe ayoboye na leta.

Machar ubu arabarizwa mu gihugu cy’Afurika y’Epfo aho yagiye kwivuza.

Mu kwezi kwa karindwi nibwo Machar yahunze umurwa mukuru Juba, nyuma y’imirwano hagati y’ingabo ze ni za leta, imirwano yahitanye abantu barenga 300.

Machar yemeza ko abasirikali be bagera kuri 70 bishwe n’ingabo za leta ubwo we nazo bahungiraga mu gihugu cya Repubulika Iharanira Demokarasi ya Kongo. Yabwiye Ijwi ry’Amerika ko icyo gihe cyose yakomeje kuvugana n’umukuru w’igihugu amusaba gutegeka ingabo ze guhagarika imirwano.

Nyuma y’imirwano ya Juba, Perezida Kiir yashinje Machar kuba yarashakaga kumwica no kumukura k’ubutegetsi. Kiir yabwiye televiziyo yo muri Kenya ko mu nama yagiranye na Machar mu kwezi kwa karindwi, Machar yari yitwaje imbunda yo mu bwoko bwa pistol.

XS
SM
MD
LG