Uko wahagera

Siriya: Ibitero mu Mujyi wa Aleppo Birakomeje


Ibitero mu mujyi wa Aleppo birakomeje

Indenge z’intambara z’Uburusiya na Siriya zaraye zigabye ibitero ku duce tugenzurwa n’inyeshyamba mu mujyi wa Aleppo, nkuko byemezwa n’imiryango ikurikiranira hafi ibibera muri uwo mujyi.

Umwe muri iyo miryango witwa Syrian Observatory for Human Rights watangaje ko mu rukerera rwo kuri uyu wa gatanu, izo ndege zagabye ibitero mu burasirazuba bwa Aleppo. Ibyo bitero biravugwa ko byahitanye bikanakomeretsa abantu benshi.

Umubare nyawo wabaguye muri ibyo bitero nturamenyekana. Biravugwako hari abandi benshi amazu yaguye hejuru.

Ibyo bitero bibaye mu gihe kuri uyu wa gatandatu hateganyijwe inama izahuza ba ministiri b’ububanyi n’amahanga ba Leta zunze ubumwe z’Amerika n’Uburusiya ari bo John Kerry na Sergei Lavrov.

Buzaba ari ubwambere abo ba ministiri bahura, nyuma y’ukwezi kumwe gusa imigenderanire y’ibyo bihugu byombi ihagaze. Amerika n’ibindi bihugu byo ku mugabane w’Ubulayi bikomeje gushinja Uburusiya na Siriya ibyaha byo mu ntambara nyuma yuko bigabye ibitero ku mavuriro mu mujyi wa Aleppo.

Mu kiganiro n’abanyamakuru, umuvugizi w’ibiro by’umukuru w’igihugu hano muri Amerika, Josh Earnest yavuze ko ibiganiro byo kuri uyu wa gatandatu bitagamije gusubukura umubano n’Uburusiya, ko ahubwo ari imwe mu nzira yo gushakisha uko intambara yahagarara hakoreshejwe inzira ya diplomasi.

XS
SM
MD
LG