Uko wahagera

Ban Ki Moon Ahamagarira abategetsi Ba Gabon Kubumbatira Amahoro


Ban Ki Moon na Ali Bongo, Perezida wa Gabon

Ban Ki Moon na Ali Bongo, Perezida wa Gabon

Umunyamabanga mukuru wa ONU Ban Ki-moon, yaraye avuganye kuri telefone na perezida wa Gabon wongeye gutorwa Ali Bongo n’uwari umukandida perezida Jean Ping, wo mu ishyaka riharanira demokarasi nshya, abasaba guhagarika urugomo mu gihugu.

Imyigaragambyo yadutse muri Gabon kuwa gatatu taliki 31 y’ukwezi ushize kwa 8, amajwi yavuye mu matora amaze gutangazwa agaragaza ko Bongo yongeye gutorwa. Bongo yarushije amajwi make uwo bari bahanganye Jean Ping mu majwi yavuye mu gihugu hose. Bongo yagize 49.8 ku ijana by’amajwi naho Ping agira 48.2 ku ijana.

Minisitiri w’ubutegetsi bw’igihugu wa Gabon, Pacome Moubelet Boubeya, yavuze ko abantu barenga 1,000 batawe muri yombi, harimo abagera kuri 800 mu murwa mukuru. Yemeje ko abantu batatu baguye muri urwo rugomo.

Nk’uko bivugwa n’ibiro by’umunyamabanga mukuru wa ONU, Ban Ki-moon, ababajwe n’ubuzima bw’abantu bwatakariye mu myigaragambyo nyuma y’itora rya perezida.

Yumvikanishiije impungenge ku butumwa bukongeza urugomo bukomeje gutangwa, ahamagarira guhita hahagarikwa ibikorwa byose by’urugomo mu gihugu.

Ban Ki-moon yanasabye ko intumwa ye yihariwe kuri afurika yo hagati, Abdoulaye Bathily, akomeza gukorana n’impande zose kugirango bahoshe umwuka mubi.

XS
SM
MD
LG