Uko wahagera

Guverinoma ya Leta zunze ubumwe z’Amerika yaraye itangaje ko yishyuye Irani amadolari miliyoni 400 mu kwezi kwa mbere gushize imaze kumenya neza ko Abanyamerika bane bari ingwate i Teherani bagiye kurekurwa.

Minisiteri y’ububanyi n’amahanga y’Amerika yemeza ko aya mafaranga atari ingurane zabo, ahubwo ko ari amafaranga Amerika yagombaga gusubiza Irani kubera isoko ry’intwaro itari yarubahirije kuva mu 1979.

Nyamara rero, abatavuga rumwe na Perezida Obama bo mu ishyaka ry’Abarepubulikani ntibabishira amakenga. Donald Trump, uzahagararira iri shyaka mu matora y’umukuru w’igihugu, yavuze ko Perezida Obama ari umubeshyi.

Depite Ed Royce ukuriye komisiyo y’ububanyi n’amahanga mu nteko ishinga amategeko we, ati: “Amerika iteye intege abo ari bo bose bashaka kwibasira Abany’Amerika.” Perezida w’Umutwe w’Abadepite, Paul Ryan, mu itangazo yashyize ahagaragara, arega Perezida Obama ko yayoboje rubanda atababwira ukuri.

Bamwe mu bategetsi b’ingabo za Irani nabo bavuga ko ariya madolari miliyoni 400 ari ingurane yo kurekura Abany’Amerika bari bafungiye i Teherani.

XS
SM
MD
LG