Uko wahagera

USA Irasaba Ituze Muri Sudani y'Epfo


 Perezida Salva Kiir na Visi perezida Riek Machar

Perezida Salva Kiir na Visi perezida Riek Machar

Leta zunze ubumwe z’Amerika zirahamagarira abayobozi mu gihugu cya Sudani y’Epfo kugerageza kugarura amahoro n’ituze nyuma yuko ingabo z’umukuru w’igihugu n’izumwungirije zikozanyijeho.

Iyo mirwano yaguyemo abantu barenga ijana.

Itangazo ryasohowe na ministeri y’Ububanyi n’amahanga ya Amerika ryasabye ingabo ingabo za Perezida Salva Kiir n’iza Visi perezida Riek Machar kugerageza guhoshya umwuka mubi uri hagati yazo.

Iyi mirwano yatangiye kuri uyu wa kane, ubwo abasilikare batanu bari ku ruhande rw’umukuru w’igihugu bicwaga. Ibyo byabaye igihe abo bayobozi bombi bari mu biganiro mu ngoro y’umukuru w’igihugu. Yaba Perezida Kiir cyangwa visi perezida we Machar, ntawurashira ahagaragara imvano y’ubwo bushyamirane, nubwo bombi basabye abasilikare babo kwirinda imvururu.

Amasezerano y’amahoro yashyizweho umukono umwaka ushyize yatumye Salva Kiir na Riek Machar batangaza ku mugaragaro ko biyunze, maze bashing leta y’ubumwe ihuriwemo n’impande zombi nyuma y’imirwano yari maze imyaka ibiri.

Icyakora Kiir wo mu bwoko bwa ba Dinka na Machar wo mu bwoko bwa ba Nuer ntibarashobora guhuza ingabo zabo. Ishami ry’umuryango w’abibumbye ryita ku biribwa ku isi riherutse gutangaza ko abaturage b’icyo gihugu barenga miliyoni enye bugarijwe n’ikibazo cy’inzara.

XS
SM
MD
LG