Uko wahagera

USA: Uwishe Abapolisi Yamenyekanye


Amafoto y'abapolisi barasiwe mu mujyi wa Dallas muri leta ya Texas

Amafoto y'abapolisi barasiwe mu mujyi wa Dallas muri leta ya Texas

Umuyobozi w’umujyi wa Dallas muri leta ya Texas muri Leta zunze ubumwe z’Amerika yemeje ko igitero cyahitanye abapolisi batanu cyagabwe n’umuntu umwe ku giti cye wamenyakanye nka Micah Johnson.

Icyo gitero cyabaye, kuri uyu wa kane igihe abantu bari mu myigaragambyo nyuma yuko abirabura babiri bishwe n’abapolisi, mu ma Leta ya Minnesota na Louisiana.

Mu kiganiro n’abanyamakuru, umuyobozi w’umujyi wa Dallas Mike Rawlings yavuze ko uwakoze ubwo bwicanyi yasize inyandiko nyinshi zigamba, zikanagaragaza uburyo azashyira mu bikorwa ubwo bwicanyi. Yahumurije abatuye uwo mujyi abasaba gukomeza imirimo yabo kuko uwakoze ayo mahano atakiriho.

Guverineri wa Texas Greg Abott we yavuze ko nubwo nyiri gukora ubwo bwicanyi atakiriho, hakwiye gukorwa iperereza kugirango abafashize uwo mwicanyi n’abandi bashobora kuba baragize uruhare muri ubwo bwicanyi bagezwe imbere y’ubutabera.

Perezida wa Leta zunze ubumwe z’Amerika Barack Obama wari mu nama y’ibihugu bigize umuryango wo gutabarana mu bihugu bya Atlantique ya ruguru ni ukuvuga iby’u Burayi na Amerika (OTAN) yatangaje ko atazakomeza iyo nama nkuko byari biteganyijwe. Obama, yavuze ko icyo gitero ku bapolisi bari basanzwe bari mu ka kazi kabo kigayitse cyane.

XS
SM
MD
LG