Uko wahagera

Uburusiya na Turukiya Biravugurura Umubano


Uburusiya na Turukiya byemeranijwe gusubukura ubufatanye mu by’ingendo n’ubuhahirane nyuma y’uko ba perezida b’ibihugu byombi, baganiriye kuri telefone. Byari ku ncuro ya mbere, kuva Turukiya ihanuye indege y’Uburusiya mu mwaka ushize.

Perezida w’Uburusiya Vladimir Putin, yavuze ko mu minota 40 yaganiriye na mugenzi we wa Turukiya, Recep Tayyip Erdogan kuri uyu wa gatatu, yabonye ko bashobora gusubukura ubuhahirane n’umubano mu by’ubukungu.

Mu itangazo, impande zombi zanemeje ko ingamba zafashwe zibuza ba mukerarugendo b’Abarusiya, gusura Turukiya, zishobora kuvanwaho.

Ba Perezida Putin na Erdogan banemeranijwe gukorana inama imbona nkubobone mu kwezi kwa 9. Ubwo izahurirana n'igihe bazaba bagiye mu nama y’abakuru b’ibihugu bigize itsinda G-20 mu Bushinwa.

Ku bireba ikiganiro hagati y’abaperezida bombi kuri uyu wa gatatu, Putin ni we wafashe iya mbere. Ubwo byari biturutse ku ibaruwa perezida wa Turukiya Erdogan yamwandikiye, yumvikanishaga ko yicuza, kuba Turukiya yarahanuye indege y’Uburusiya umwaka ushize.

XS
SM
MD
LG