Igihugu ca Isiraheli hamwe n’ica Turikiya, vyateye igikumu ku masezerano yo gusubira kwunga imigenderanire myiza, irangiza umwuka mubi war’umaze imyaka itandatu.
Umushikiranganji wa mbere wa Isiraheli Benjamin Netanyahu, yatangaje ari I Roma, kw’ingingo yo guhagarika uruja n’uruza mu mazi yo mu muhora wa Gaza, ruzobandanya. Yamara, yasiguye ko imfashanyo z’imbabare, zishobora gushikanwa muri Gaza zicishijwe ku bivuko vyo muri Isiraheli.
Netanyahu yarabonanye ku musi wa mungu na sekereteri wa deparitoma ya reta ya Amerika, John Kerry, I Roma imbere y’uko atangaza iyo nkuru.
Imigenderanire hagati y’igihugu ca Isiraheli hamwe n'ica Turikiya yahagaze mu mwaka w’2010, inyuma y’aho gihagarikiye ubwato bwa Turkiya bwari butwaye imfashanyo mu muri Gaza.
Abanyaturikiya 10 baharanira ineza y’abanyagihugu barahasize ubuzima, hanyuma Turikiya gisaba indishi z’akababaro hamwe n’ukura ingingo ibuza imfashanyo gushika muri Palesitina.