Mu gihugu ca Afirika y’epfo, imigumuko irimwo n’ubugizi bwa nabi irabica bigacika, mu gihe ico gihugu cimirije amatora y’indongozi zo ku mitumba mu ntango z’ukwezi kwa munani.
Abigaragamvya k’umusi wa kabiri, baraturiye imiduga n’amapine, barasahura amamangazine ndetse baranatera amabuye imiduga yose irengana mu gashavu bafitiye umugambwe ANC uri k’ubutegetsi.
Ako gashavu bagaterwa n’ukuntu umugambwe uri k’ubutegetsi ukoresha ka nkunzi mu gutanga ubuzi no kugena mu mabanga indongozi mu bisata bitandukanye vy’igihugu.
Abakurikirana hafi ibibera mur’ico gihugu bamenyesha ko iyo migumuko ishobora kubandanya gushika n’aho hazobera amatora yo k’urwego rw’igihugu mu myaka itatu iri imbere.
Bamenyesha ko igihugu ca Afirika y’epfo kigiye kumera nabi mu butunzi na politike mu myaka iri imbere bivanye n’urwo ruhagarara.