Uko wahagera

USA:Abantu 50 Bishwe mu Mujyi wa Orlando


Abapolisi bageze aho umugabo yarasiye abantu barimo kwidagadura i Orlando, muri Leta ya Florida ku italiki 12, 2016.

Abapolisi bageze aho umugabo yarasiye abantu barimo kwidagadura i Orlando, muri Leta ya Florida ku italiki 12, 2016.

Mu gitondo cyo ku cyumweru taliki 12 y’ukwezi kwa 6 umwaka wa 2016, umugabo wari ufite imbunda yishe abantu 50 mu nzu bidagaduriramo mu mujyi wa Orlando muri Leta ya Florida . Abandi bantu 53 barakomeretse.

Uwo mugabo yamenyekanye ku mazina ya Omar Saddiqui Mateen ufite ubwenegihugu bwa Leta Zunze Ubumwe z’Amerika. Ababyeyi be bakomoka muri Afuganisitani.

Ibiro by’Amerika bishinzwe iperereza FBI bakeka ko ayo masasu ariyo ahitanye abantu benshi cyane mu mateka y’Amerika.

Harimo gukorwa iperereza ku cyiswe “igikorwa cy’iterabwoba”.

Umuvugizi wa FBI Ron Hopper yavuze ko bikiri kare kugirango babe bahamya ko ari igikorwa cy’iterabwoba cyangwa icy’urwango. Yavuze ko bizemezwa amaperereza amaze gukorwa.

Senateri Bill Nelson wo muri leta ya Florida yavuze ko abategetsi bashinzwe umutekano bamumenyesheje ko uwarashe ashobora kuba yararahiriye kwifatanya n’umutwe wa Leta ya Kiyisilamu. Yavuze kandi ko amaperereza azibanda i Fort Pierce na St. Lucie mu muri leta ya Florida aho uwarashe yari atuye.

Prezida Barack Obama yategetse guverinema y’igihugu gutanga abakora amaperereza n’ibyo bakenera byose. Yanagize ati “dufite ku mu mutima kandi kandi turazirikana mu masengesho yacu imiryango n’abakozwe n’ubwicanyi.”

XS
SM
MD
LG