Abategetsi bashinzwe umutekano muri Ukraine bemeje ko bataye muri yombi umugabo w’Umufaransa warundanyije intwaro akaba yari afite umugambi wo kugaba igitero mu irushanwa ry'umupira w'amaguru ry'ibihugu ku mugabane w'Ubulayi.
Umuyobozi w'urwego rushinzwe umutekano muri Ukraine Vasyl Grytsak yavuze ko uwo mugabo utatangajwe umwirondoro yageze muri Ukraine mu kwezi kwa 12 umwaka ushize wa 2015 yiyita umukorera bushake uje gutanga infashanyo.
Grutsak yavuze ko uwo mugabo yateganyaga kugaba igitero aho nsengero z'abayahudi n'abayisilamu. Ahandi ni ku biro byakira imisoro by’ubufaransa, ahacungirwa imodoka zinyura mu mihanda yihuta, no ku nyubakwa z’ahazabera imikino y’ubulayi yo mu 2016. Iyo mikino izaba kuva ku italiki ya 10 y’uku kwa gatandatu kugeza ku ya 10 y’ukwezi kwa gutaha kwa kalindwi.
Yavuze ko ibitero 15 byari biteganyijwe.
Abategetsi muri Ukraine bavuze ko bafashe uwo mugabo ku italiki ya 21 y’ukwezi kwa gatanu ubwo yari agiye gutambuka kuri bariyeri i Yahodyn hafi y’umupaka w’igihugu cya Pologne.
Abategetsi b’ubufaransa bavuga ko nta perereza ryari ryatangira.
Polisi y’ubufaransa ivuga ko abashinzwe gucunga uko umutekano wubahilizwa bazaba bari mu myanya mbere y’uko iyo mikino mu bulayi itangira.