Uko wahagera

Mbarushimana Akomeje Guceceka mu Rubanza


Emmanuel Mbarushimana

Emmanuel Mbarushimana

Urukiko rukuru mu Rwanda rwateye utwatsi ubusabe bw'abahagarariye inyungu z'ubutabera mu rubanza rwa Emmanuel Mbarushimana.

Abahagarariye inyungu z'ubutabera baravuga ko ubushinjacyaha bwatubuye ibyaha bya jenoside n'ibyibasiye inyokomuntu bubigira bitanu.

Baravuga ko bashingiye ku ngingo z'amategeko ahana ibyaha mu Rwanda basanga Mbarushimana yaburana icyaha cya jenoside n'ikibasiye inyokomuntu gusa.

Ukurikije uko Me Bizimana na Twagirayezu babisobanura, Mbarushimana yagombye kuba aburana ibyaha bibiri.

Ariko ubushinjacyaha bwo busanga nta bushakashatsi abahagarariye inyungu z'ubutabera bashingiraho bagaragaza ko bwatubuye ibirego. Bukavuga ko mu rubanza hagati umucamanza atahita akuraho bimwe mu byaha.

Nyuma yo kwiherera umucamanza bwana Antoine Muhima yanzuye ko ubusabe bw'abahagarariye inyungu z'ubutabera mu rubanza rwa Mbarushimana nta shingiro bufite. Yavuze ko ntaho amategeko ateganya ko yakuraho bimwe mu birego. Bityo ko azabisuzumira hamwe mu ica ry'urubanza.

Mbarushimana we yakomeje umurongo yafashe wo guceceka mu rubanza. Ararangwa no kugaragara yandika ibivugwa ubundi akitangira itama.

Icyakora yongeye kwaka ijambo ashimangira ko abahagarariye inyungu z'ubutabera mu rubanza rwe ibyo bakora ntaho ahuriye na byo.

Mbarushimana w'imyaka 54 y'amavuko araregwa ibyaha 5 bikomeye kandi bidasaza bya jenoside n'ibyibasiye inyokomuntu .

Ubutabera bumukeka ko yabikoreye muri Komini Muganza ubu ni ntara y'amajyepfo ,hari mu myaka ya za 1990-1994.

XS
SM
MD
LG