Uko wahagera

Umunyamakuru Muri Turkiya Yarokotse Igitero


Umunyamakuru Can Dundar n'umugore we ubwo yari amaze gukatirwa

Umunyamakuru Can Dundar n'umugore we ubwo yari amaze gukatirwa

Muri Turkiya inzego z’umutekano zataye muri yombi abagabo babiri baregwa kugaba igitero k’umunyamakuru Can Dundar, amasaha make mbere yuko urukiko rumukatira igihano cyo gufungwa imyaka itanu.

Dundar, uyobora ikinyamakuru Cumhuriyet cyegamiye ku mashyaka atavuga rumwe na leta yakatiwe imyaka itanu aregwa gushira ahagaragara amabanga y’igihugu.

Icyakora urukiko rwamuhanaguyeho icyaha cyo gushaka guhirika ubutegetsi. Ikinyamakuru Cumhuriyet kigeze gutangaza ko Turkiya igurisha Syria intwaro mu buryo butemewe n’amategeko.

Dundar yarashwe n’umugabo wagaragaye asakuza amwita umugambanyi hanze y’urukiko. Umwe mu banyamakuru bakorera televiziyo y’igenga yakomeretse ukuguru. Ifungwa ry’uwo munyamakuru byafashwe nk’ikigeragezo ku bwisanzure bw’itangazamakuru muri Turkiya.

Ishyirahamwe rirengera abanyamakuru Committee to Protect Journalists yamaganye ifungwa ry’uwo munyamakuru.

Leta zunze ubumwe z’Amerika nazo zatangaje ko zidashimishijwe n’igihano cyahawe uwo munyamakuru. Umuvugizi wa ministeri y’ububanyi n’amahanga John Kirby yasabye Turkiya gushyigikira itangazamakuru ry’igenga kuko ari inkingi ikomeye ya demokarasi.

Mu ntangiriro z’uyu mwaka, visi perezida w’Amerika Joe Biden yaneze bikomeye abategetsi muri Turkiya kuba babangamira imikorere y’itangazamakuru. Kuva aho atorewe kuyobora Turkiya abantu barenga 2,000 bamaze gufungwa bazira gutuka umukuru w’igihugu Recep Tayyip Erdogan.

XS
SM
MD
LG