Uko wahagera

Rwanda: Urubanza rwa Munyagishari Rwakomeje Adahari


Bernard Munyagishari

Bernard Munyagishari

Umucamanza mu rukiko rukuru mu Rwanda yakomeje kuburanisha urubanza Bernard Munyagishari ahanganyemo n'ubushinjacyaha ku byaha bya jenoside n'ibyibasiye inyoko muntu mu 1994 adahari.

Abunganizi mu mategeko atemera bagenwe ku nyungu z'ubutabera ni bo biriranywe ijambo banenga ibirego by'ubushinjacyaha.

Me Bruce Bikotwa na mugenzi we Me Jeanne d'Arc Umutesi basabye urukiko gutesha agaciro ikirego cy'ubushinjacyaha. Baravuga ko nta bimenyetso simusiga bushingiraho burega Munyagishari ibyaha bya jenoside n'ibyibasiye inyokomuntu bumukekaho ko yakoreye ku Gisenyi mu 1994.

Aba banyamategeko kandi babwiye umucamanza ko ikirego cy'ubushinjacyaha kibumbatiye ukwivuguruza gukomeye.

Bwana Munyagishari ari mu bantu batatu boherejwe n'urukiko mpuzamahanga mpanabyaha rwashyiriweho u Rwanda i Arusha.

Yageze mu Rwanda mu mwaka wa 2013 kuhaburanishirizwa ibyaha bya jenoside n'ibyibasiye inyokomuntu.

Ni ibyaha ubushinjacyaha bumukekaho ko yabikoreye mu cyahoze ari Perefegitura ya Gisenyi ubu ni mu ntara y'Uburengerazuba bw'u Rwanda.

Uregwa ntabyemera. Ahakana avuga ko ubushinjacyaha bw'u Rwanda bumutwerera ubwenegihugu kuko avuga ko ari umunyekongo.

XS
SM
MD
LG