Uko wahagera

ONU Igiye Kohereza Abapolisi Mu Burundi


Akanama gashinzwe Umutekano k’Umuryango w’Abibumbye katoye umwanzuro utegeka ko mu Burundi hoherezwa itsinda ry’abapolisi bazafasha kugenzura uko umutekano wifashe mu gihugu.

Uwo mwanzuro watowe n’abagize ako kanama bose, wahaye umunyamabanga mukuru w’Umuryango w’Abibumbye Ban Ki-moon iminsi 15 kuba yabahaye igisubizo kuri icyo cyemezo, nyuma yo kuvugana na guverinoma y’Uburundi.

Ambasaderi Francois Delattre w’Ubufaransa yavuze ko uyu mwanzuro ari intambwe ya mbere yo gufasha kongerera ubushobozi Umuryango w’Abibumbye mu Burundi. Ibyo ngo bizatuma barushaho gukurikiranira hafi uko uburenganzira bwa muntu bwifashe muri icyo gihugu no kumenya amakuru nyayo ku bibera mu Burundi.

Icyakora, uwo mwanzuro ntuvuga umubare w’abapolisi ba LONU bazoherezwa mu Burundi.

Muri iki cyumweru uwungirije intumwa y’Uburusiya muri LONU Petr Iliichev yavuze ko umubare w’abapolisi bazoherezwa mu Burundi ushobora kutarenga 100, ko kandi bashobora kuzaba batitwaje intwaro.

Mbere yuko uwo mwanzuro utorwa, intumwa y’Uburundi I New York mu Muryango w’Abibumbye Albert Shingiro, yabwiye Ijwi ry’Amerika ko biteze umubare w’abapolisi uri hagati ya 20 na 30.

Ubwo uwo mwanzuro wari umaze gutorwa, Ambasaderi Shingiro yashimangiye ko Uburundi butazigera bwemera ingabo zitwaje imbunda mu gihugu, kandi ko icyemezo kigomba gufatwa nyuma y’ubwimvikane hagati y’Uburundi n’Umuryango w’Abibumbye.

Umwanzuro watowe kuri uyu wa gatanu unavuga ko uzafatira ibihano abageregeza guhungabanya umutekano no kubangamira imigambi yo gushakira umuti ibibazo by’Uburundi; baba bari mu Burundi cyangwa hanze yabwo.

Ubwo intumwa z’akanama k’umutekano ka LONU, n’umunyamabanga mukuru Ban Ki-moon basuraga Uburundi mu ntangiriro z’uyu mwaka, Perezida Pierre Nkurunziza yabijeje ko Uburundi bugiye gufungura amaradiyo yigenga yafunzwe, bugahagarika inzandiko zifatisha abatavuga rumwe na leta, ndetse bukanafungura imfungwa za politike 1,200.

Uwungirije ambasaderi wa Leta zunze ubumwe z’Amerika David Pressman, yavuze ko ibyo Uburundi bumaze gukora kugirango bwubahirize ibyo rwasezeranyije izo ntumwa, bidafatika.

Bwana Pressman yavuze ko Uburundi busohora amatangazo agenewe abanyamakuru kurusha uko bwakarekuye imfungwa za politike.

Biteganyijwe ko intumwa yihariye y’umunyamabanga mukuru wa LONU Jamal Benomar asubira mu Burundi mu cyumweru gitaha kugirana ibiganiro n’abayobozi batandukanye mu Burundi.

XS
SM
MD
LG