Uko wahagera

USA: Itora muri Florida na Ohio ni Kamara ku Barepubulika


Abo bakandida bane b'Abarepubulika ni umunyemari Donald Trump, Senateri Ted Cruz, Senateri Marco Rubio na Guverineri John Kasich
Abo bakandida bane b'Abarepubulika ni umunyemari Donald Trump, Senateri Ted Cruz, Senateri Marco Rubio na Guverineri John Kasich

Kwiyamamaza kw’abakandida ku mwanya wa perezida w’igihugu birakomeje ku mashyaka abiri akomeye. Ejo kuwa kane, abakandida bane b’ishyaka ry’abarepubulika basigaye bakoze ikiganiro mpaka mbere y’itora ryo kuri uyu wa gatandatu.

Abo bakandida ni umunyemari Donald Trump uri kw’isonga mu majwi, Senateri Ted Cruz wo muri Texas uza ku mwanya wa kabiri mu majwi, Senateri Marco rubio ukomoka muri leta ya Florida, ari ku mwanya w agatatu na Guverineri John Kasich wo muri leta ya Ohio.

Iryo tora rigaragara ko rizahishura byinshi biteganijwe muri za leta za Ohio na Florida. Itora rizaba kandi muri za leta za Illinois, Missouri na Carolina ya Ruguru kuwa kabiri w’icyumweru gitaha. Birashoboka ko amatora kuri iyi minsi ibiri ashobora guha umunyemari Trump amajwi yamuha akarusho ko kuzemezwa n’ishyaka rye muri Kongre ku rwego rw’igihugu.

Senateri Rubio yiteze ibitangaza kw’itora rizaba muri Florida akomokamo kuri uyu wa gatandatu. Kugeza ubu, amaperereza akorwa ku bantu bazatora muri leta ntaha Rubio amahirwe adasubirwaho. Amenshi muri yo agaragaza ko Rubio aza inyuma ya Trump amanota 15.

Undi mukandida witeze gutsinda muri leta akomokamo, bitaba agasezera ni Guverineri John Kasich ukomoka ohio. Amaperereza yakozwe yerekana ko bwana Kasich yaba arusha Trump amajwi ari hejuru ya 20 muri iyo leta.

Uko biri kose, Trump aramutse atsinze Florida na Ohio, Rubio na Kasich bahita bisezerera. Ubwo urugamba rwaba rusigaye hagati ya Donald Trump na Senateri Ted Cruz ukomoka muri leta ya Texas, aho yatsinze mu minsi mike ishize.

Mu kiganiro mpaka cyabaye ejo kuwa kane, Ted Cruz yasaga n’ushaka kureshya abantu batora Trump, abumvisha ko imyitwarire ye n’amagambo akoresha atatuma aba perezida wa Leta zunze ubumwe z’Amerika. Byose ni ukubitega amaso nyuma y’itora ry’ejo kuwa gatandatu no kuwa kabiri w’icyumweru gitaha.

XS
SM
MD
LG