Uko wahagera

Uburenganzira bwa muntu mu Burundi no mu Rwanda mu 2015


Umuryango mpuzamahanga uharanira uburenganzira bwa muntu Human Rights Watch, HRW mu magambo ahinnye, wasoye icyegeranyo ku byabaye mu mwaka ushize.

Ku birebana n’Uburundi, igice kinini cya raporo ya HRW kiribanda ku midugararo ya politiki yashubije inyuma cyane demokarasi n’umudendezo wa rubanda.

Mu kwezi kwa kane 2015, bamwe mu baturage batangiye imyigaragambyo yo kwamagana umugambi wa Perezida Pierre Nkurunziza wo kongera kwiyamamariza kuyobora igihugu.

Iyo raporo ivuga ko abashinzwe umutekano babakoreshejeho ingufu zikabije. Imitwe yitwaje imbunda nayo yaravutse. Ari yo, ari n’inzego z’umutekano, bose bishe abaturage barenga ijana mu mezi atandatu ya nyuma y’umwaka w’2015. Abandi baturage barenga ibihumbi 200 bahungiye mu bihugu by’abaturanyi, cyane cyane muri Tanzaniya n’u Rwanda.

Ku birebana n’u Rwanda, HRW iribanda ku kibazo cy’uburenganzira bwo gutangaza icyo utekereza n’ubwa politiki bwakomeje guhungabana. HRW iravuga, ko ugereranije n’imyaka yashize, amaradiyo yigenga amwe n’amwe yatangaje ibiganiro byinshi bigaragaza ibitagenda neza mu mitegekere ya guverinoma, ariko rero ibishyigikira guverinoma byabirushije ubwinshyi kurusha.

HRW iributsa kandi ko guverinoma y’u Rwanda yafunze ibiganiro by’Ikinyarwanda bya radiyo BBC.

Mu rwego rwa politiki, HRW ivuga ko ishyaka riri ku butegetsi FPR ryihariye imyanya myinshi mu nteko ishinga amategeko. Uwo muryango wakomeje uvuga ko amashyaka atavuga rumwe na leta yabuze urwinyagamburiro. Iributsa ko umuyobozi w’ishyaka FDU-Inkingi, Ingabire Victoire, ari muri gereza kuva mu 2012. Yakatiwe gufungwa imyaka 15.

HRW iributsa kandi ibyakozwe kugirango itegekonshinga rivugururwe ku buryo Perezida Paul Kagame azakomeza gutegeka, n’uburyo ishyaka riharanira demokarasi no kurengera ibidukikije ryatanze mu nkiko ikirego cyo gutambamira iryo vugururwa ariko riratsindwa buhenu.

HRW irishimira ko ku italiki ya 30 y’ukwa gatandatu gushize u Rwanda rwemeye amasezerano mpuzamahanga yo kurwanya iyicarubozo

XS
SM
MD
LG