Umukozi wo mu by'ubuvuzi w'umunyamerika wanduye Ebola muri Sierra Leone ubu aravurirwa mu bitaro by'ikigo k'igihugu kita ku ndwara muri leta ya Maryland. Ni mu nkengero z'umujyi wa Washington, DC.
Abategetsi bavuga ko uwo murwayi, wagiye kwita ku barwayi ba Ebola ku bushake bwe, yinjijwe ibyo bitaro ejo kuwa gatanu mu masaha ya kare. Yazanywe mu ndege yashyizwe mu kato.
Abaganga bamusuzumye bavuze ko arembye cyane akimara kuhagera.
Abayobozi b'icyo kigo kita ku ndwara, kizwi kw'izina rya NIH (National Institutes of Health) nta yandi makuru batanze ku mwirondoro w'uwo murwayi. Uyu ni umurwayi wa 11 uvuriwe Ebola muri Leta zunze Ubumwe z'Amerika.
Abashinzwe iby'ubuzima muri Amerika bavuga ko undi munyamerika wa kabiri, ushobora kuba yarahuye n'abantu banduye Ebola muri Sierra Leone yashyizwe mu bitaro mu mujyi wa Atlanta, aho azaba ari hafi y'ibitaro bya kaminuza ya Emory. Ibi ni ibindi bitaro byazobereye mu kuvura indwara z'ibyaduka nka Ebola.
Ikigo CDC, gishinzwe ubugenzuzi bw'indwara, cyubatse mu mujyi wa Atlanta, kivuga ko uwo muntu ataragaragaza ibimenyetso by'uko yanduye Ebola.