Uko wahagera

Umuyobozi mukuru w’umuryango utabara imbabare Croix Rouge yavuze ko gukumira icyorezo cya Ebola kimaze guhitana abantu barenga 4,500 bishobora gufata hagati y’amezi 4-6, ingamba nyazo ziramutse zikurikijwe.

Mu kiganiro yahaye abanyamakuru ari mu Bushinwa, Elhadj As Sy yavuze ko abakekwaho iyo ndwara bakwiye gushyirwa mu kato, abanduye bakavurwa, abapfuye nabo bagashyingurwa hakurikijwe uburyo bwagenwe budatuma abashyigura bandura iyo ndwara.

Ibi bwana Sy abivuze mu gihe ishami ry’umuryango w’abibumbye ryita ku buzima OMS, riri mu nama yo kwiga ingamba nshya zo kwirinda no gukumira icyoreza cya Ebola.

Hagati aho, sosiyete ikora imiti ya Johnson & Johnson yo muri Amerika yatangaje ko ifatanyije n'indi yitwa Bavarian Nordic yo muri Danemark barimo gukora urukingo rwa Ebola bakeka ko bazakorera igerageza mu kwezi kwa mbere k’umwaka utaha.

Iyi sosiyete ivuga ko imaze gushora miliyoni 200 z’amadolari mu bushakashatsi kuri Ebola.

Kuri uyu wa kabiri, OMS yatangaje ko urukingo rwa Ebola rushobora kuzaba rwabonetse muri uku kwa mbere.

Umuyobozi wungirije wa OMS Marie Paul Kieny yavuzeko igeragezwa rw’urwo rukingo ririmo gukorwa muri Amerika, ku mugabane w’Uburayi n’Afurika. Yavuze ko nibasanga urwo rukingo rukora, ruzatangira kugeragezwa ku bantu muri Afurika y’uburengerazuba mu kwezi kwa mbere k'umwaka utaha.

XS
SM
MD
LG