Uko wahagera

Amerika yibutse abazize ibitero bya 9/11


Prezida Barack Obama, umufasha we Michelle, na visi prezida Joe Biden.

Prezida Barack Obama, umufasha we Michelle, na visi prezida Joe Biden.

Hashize imyaka 13 Leta zunze ubumwe z’Amerika igwiririwe n’ishyano ry’iterabwoba ryahitanye abantu bagera ku bihumbi bitatu.

Kuri uyu wa kane, Prezida Barack Obama yagiye kubunamira.

Mu muhango wa mbere, prezida Obama na madame we Michelle, bari kumwe na visi prezida Joe Biden, n’abandi baturage, bafashe akanya ko guceceka umunota mu busitani bwa prezidansi ku isaha indege ya mbere yaguye ku nyubakwa ndende cyane yo mu mujyi wa New York, mu gitondo saa mbili na 46.

Mu muhango wa kabili, prezida Obama yagiye kuri ministeri y’ingabo za Leta zunze ubumwe z’Amerika, nayo indege yiroshyeho ku italiki ya 11 y’ukwa cyenda mu 2001, ihahitana abantu amagana. Mu ijambo yahavugiye, Obama yashimangiye ko umugambi w’abaterabwoba waburiyemo.

Obama aragira, ati: “Imyaka 13 irashize agaco k’abantu mbarwa, bamunzwe n’urwango, bashatse kutujegeza. Nyamara Amerika iracyahagaze bwuma, Amerika iracyahagaze n’ishema n’isheja. Kandi tuzagenda dukomera kurushaho, dushingiye ku mahame yamye atuyobora. Imyaka izakomeza ihite indi itahe Abany’Amerika bakomeze buzure imijyi, ubusitani bwayo, na za stade. Abany’Amerika bazakomeza bubake imiturirwa buri gihe miremire kurushaho ikabakaba ijuru. Bazakomeza kwitanga muri za ambassades ziharanira ubwisanzure hose ku isi. Bazakomeza bitange mu gisilikali. Gusa kugirango bakomeze bashimangire amagambo amaze imyaka 200 yanditswe ko ubu ari “Ubutaka bw’ubwigenge, iwabo w’intwari.”

Naho ministri w’ingabo za Leta zunze ubumwe z’Amerika, Chuck Hagel, yavuze ko kwibuka bizahoraho.

Hagel, ati: “Nta na rimwe tuzigera twibagirwa ibyabaye aha hantu turi, ku munsi nk’uyu, ku isaha nk’iyi, igikorwa cy’iterabwoba cyatigishije isi kandi cyahitanye Abany’Amerika 184. Uyu munsi, turazirikana abaguye hano uwo munsi, dukikijwe n’ababakunda.”

Ishyano ryagwiririye Abany’Amerika ku italiki ya 11 y’ukwa cyenda mu 2001 ni kimwe mu bituma imitwe y’iterabwoba ikibahangayikishije cyane bikomeye.

Muri urwo rwego, barazirikana urugamba bahanganyemo na Etat Islamique muri Iraq, na al-Shabab yo muri Somalia.

XS
SM
MD
LG