Uko wahagera

Prezida Putin Arasaba Ihagarika ry'Imirwano mu Turere twa Donetsk na Luhansk


Prezida Petro Poloshenko wa Ukraine na mugenzi we w'Uburusiya Vladmir Putin

Prezida Petro Poloshenko wa Ukraine na mugenzi we w'Uburusiya Vladmir Putin

Prezida w’Uburusiya, Vladimir Putin, aratangaza ko yabonye umugambi w’amahoro muri Ukraine. Kuri uyu wa gatatu, yasabye impande zombi guhagarika imirwano mu turere twa Donetsk na Luhansk mu burasirazuba bwa Ukraine.

By’umwihariko, Putin yavuze ko abasilikali ba leta ya Ukraine bakwiye kuva mu birindiro byabo, bakajya ahantu imbunda zabo zirasa kure cyane zidashobora kugeza ahantu hatuwe muri utwo turere, no guhagarika gukoresha indege z’intambara.

Putin yasabye ko infungwa z’intambara zirekurwa ku mpande zombie nta mananiza, gufungura imihora yo kunyuzamo imfashanyo no kureka impunzi zihita, no kohereza abahanga bo gusana ibyangijwe n’intambara muri Donetsk na Luhansk. Umukuru w’Uburusiya yavuze kandi ko amahanga atagomba kwivanga mu birebana n’agahenge.

Akimara kumva iby’uwo mugambi wa Prezida Putin, ministri w’intebe wa Ukraine, Arseniy Yatsenyuk, yahise atangaza ko “ari amagambo gusa” agamije kuyobya uburari kugirango amahanga adafatira Uburusiya ibindi bihano.

Mu itangazo yashyize ahagaragara, Yatsenyuk yagize ati: “Intangamugabo ni andi masezerano Uburusiya bwirengangije cyangwa bwarenzeho kugeza ubu.” Kuri we, umugambi nyakuri w’Uburusiya ni ugushwanyaguza Ukraine no kuzura icyahoze ari Republika zunze ubumwe z’Aba-Soviets.

Mu itangazo Poloshenko nawe yashyize ahagaragara, arizera ko amasezerano y’amahoro azagerwaho kuri uyu wa gatanu mu nama izahuza intumwa za Ukraine, Uburusiya n’Umuryango w’umutekano n’ubutwererane mu Bulayi.

XS
SM
MD
LG