Igisasu cya gerenade cyatewe mw’ijoro ryo kw’italiki ya 1/3/2011 mu gace ka Kimisagara na Nyakabanda mu mujyi wa Kigali. Polisi y’igihugu yatangaje ko cyakomerekeje abantu icumi. Polisi yatangaje ko bose uko ari 10 bagejejwe ku bitaro bikuru bya Kigali ku buryo bwihuse. Umunani muri bo bahise basezererwa.
Mw’itangazo yashyize ahagaragara kw’italiki ya kabiri ya 2/3/2011, polisi yatangaje ko batatu mu bacyekwaho gutera iyo gerenade batawe muri yombi. Yongeyeho ko babyiyemerera, kandi ko bafitanye imikoranire n’abantu 29 bamaze kugezwa imbere y’urukiko.
Icyo gisasu gishya ni icya kabiri gitewe mu Rwanda mu mwaka wa 2011, nyuma y’icyatewe ahitwa ku giporoso i Remera mu mpera z’ukwezi kwa 1 mu mwaka wa 2011. Abantu 29 bacyekwaho gutera ibisasu bya gerenade hirya no hino mu Rwanda bagejejwe imbere y’urukiko kw’italiki ya 28 y’ukwezi kwa kabiri.